Media & news Te hunga pāpāho me ngā rongo kōrero

Back to all media & news

Te wā whakamutunga ki te huri rārangi pōti i te Kōwhiringa Pōti Māori

Jul 19, 2018 | Media release

Kei te pau haere te wā ki ngā kaipōti Māori ki te kōwhiri ko tēhea te rārangi pōti e hiahia ana rātau ki te eke ki runga, arā, te rārangi Māori, te rārangi whānui rānei.

E āhei anake ngā kaipōti Māori te kōwhiri ko tēhea te rārangi e hiahia ana rātau i tō rātau rēhita tuatahi ki te pōti, i te wā hoki o te Kōwhiringa Pōti Māori ka tū i ia rima tau, ono tau rānei, ā, kei te tū i tēnei wā.  I tīmata te Kōwhiringa i te Paengawhāwhā ka mutu ā te rua wiki hei te Tāite te 2 o Hereturikōkā.

"Koinei te wā whakamutunga mō ngā kaipōti Māori ki te huri rārangi, mēnā e hiahia ana rātau," te kī a Mandy Bohté, Kaiwhakahaere ā-Motu o te Rēhita me te Whitiwhiti ā-Iwi.  "Hei te 2024 rā anō te whai wāhitanga whai ake, nō reira kei runga i tō kōwhiringa ināianei e tohu ana ko tēhea te rārangi ka eke atu koe mō ngā pōtitanga whānui e rua."

Ka pōti ngā kaipōti rārangi Māori mō tētahi kaitono kei roto i te rohe pōti Māori e noho ana rātau, ā, ka pōti ngā kaipōti kei te rārangi whānui mō tētahi kaitono kei te rohe pōti whānui e noho ana rātau. Ahakoa kei tēhea rārangi e noho ana rātau, ka kōwhiria e rātau aua rōpū tōrangapū anō kei te rārangi kotahi ina tuku ana rātau i tā rātau pōti rōpū.

"Mēnā e pai ana ki a koe te rārangi kei runga koe, kāore he paku aha hei mahi māu.  Engari mēnā e hiahia ana koe ki te huri mai i te rārangi whānui ki te rārangi Māori, mai i te rārangi Māori rānei ki te rārangi whānui, koinei te wā mōu ki te kōwhiri," te kī a Ms Bohté.

Ko ngā kaipōti e hiahia ana ki te huri rārangi ka taea mā te whakahoki i te reta kei te mōkī mōhiohio i tukuna ki ngā rārangi Māori i te Paengawhāwhā, mā te whakakī rānei i tētahi puka rēhita hou.  Ko te tikanga tere rawa mō te whakahoki i tētahi puka ko te karapa, tango whakaahua rānei ka mēra atu ki maorioption@elections.org.nz, te tukuatu rānei ki www.maorioption.org.nz.  Ka taea ngā puka te whakahoki atu mā te mēra, ā, me uru ki te pōhi i mua o te 27 o Hōngongoi kia mātua tae atu i te wā tika.

Mō ētahi atu mōhiohio, te tono rānei mō tētahi puka rēhita, haere ki www.maorioption.org.nz, waea rānei ki 0800 36 76 56.

Back to top