Ko ngā huringa o te Kōwhiringa Pōti Māori
Ka āhei ngā uri Māori e hiahia ana ki te whakawhiti rārangi pōti i mua i te Pōtitanga Whānui o tēnei tau ki te whakawhiti hei āpōpō, hei te 31 o Māehe, tae atu ki te 13 o Hūrae.
Nā tētehi huringa ture e āhei ana te Māori ki te whakawhiti i te rārangi whānui, i te rārangi Māori rānei ahakoa te wā, engari kaua i te 3 marama i mua i tētehi pōtitanga.
I ngā tau o mua, ka āhei anake te Māori ki te whakawhiti rārangi i te wā o te Kōwhiringa Pōti Māori ka tū i ia 5 tau, i ia 6 tau rānei.
‘Ka nui te pānga o tēnei huringa ki ngā kaipōti Māori, i te mea ka ngāwari ake tā rātou whakawhiti rārangi pōti,’ te kī a te Amokapua, a Karl Le Quesne.
Ko ngā kaipōti Māori e hiahia ana ki te whakawhiti rārangi pōti i mua i te Pōtitanga Whānui o te 14 o Oketopa me whakawhiti i mua i te 13 o Hūrae i te waenganui pō.
Hei tā Karl Le Quesne, 'E tuku ana mātou i ngā mōkī pārongo ki ngā kaipōti 512,000 kua rēhitatia, ā, kua kī mai he uri Māori rātou, hei whakamāramatanga mō te kōwhiringa nei’.
Ka whakaputaina hoki he whakatairanga, ā, ka whakaritea he whakawhitiwhiti kōrero ā-hapori hei toro atu ki te hunga kāhore anō kia rēhita ki te pōti me te hunga kua hūnuku whare.
'Ka āhei ngā tāngata i mate ki te hūnuku whare nā te Huripari Gabrielle ki te waea mai ki 0800 36 76 56 e whiwhi ai rātou i ētehi whakamāramatanga nō, ka mutu, ka āhei ki te haere ki vote.nz ki te whakahou i ō rātou taipitopito wāhi noho, ki te whakawhiti rārangi rānei,’ e kī ana a Karl Le Quesne.
Hei tā Hone Matthews, hei tā te Amo Māori o Te Kaitiaki Take Kōwhiri, he kōwhiringa whai take tēnei mā te Māori.
‘Ko tā te Māori he kōwhiri i te rārangi pōti Māori, i te rārangi pōti whānui rānei ina rēhita ia ki te pōti,’ hei tā Hone Matthews.
‘Mehemea kei te rārangi Māori koe, ka pōti koe mō tētehi kaitono i te rohe pōti Māori e noho nā koe, heoi, mehemea kei te rārangi whānui koe, ka pōti koe mō tētehi kaitono i te rohe pōti whānui e noho nā koe. Kotahi anake te rārangi o ngā rōpū tōrangapū hei pōti māu, ahakoa kei te rārangi Māori koe, ahakoa kei te rārangi whānui rānei.
‘Tāria te mōkī pārongo i tō mēra, whakaarohia hoki te rārangi e hiahia nā koe. He mana tō te kōwhiri,’ te kī a Hone Matthews.