Kua whiwhi koe i tō mōkī Kōwhiringa Pōti Māori?
Kua tatū atu ngā mōkī pārongo mō te Kōwhiringa Pōti Māori ki ngā kaipōti Māori i te mēra.
Ko te Kōwhiringa Pōti Māori he kōwhiringa mā te Māori ki te rēhita ki te rārangi Māori, ki te rārangi whānui rānei. I te tīmatanga o te Āperira, i tukuna he mōkī pārongo ki ngā kaipōti 512,000 i tohu mai he uri Māori i ō rātou rēhitatanga ki te pōti.
E kī ana te Amokapua, a Karl Le Quesne, kei roto i te mōkī tētehi reta e whakaū ana i te rārangi e noho nā te kaipōti ināianei, me ētehi pārongo mō te ara e whakawhiti rārangi ai te kaipōti, mehemea e hiahia ana ki te whakawhiti.
‘Mehemea he Māori koe, ā, kua rēhita ki te pōti, kua whiwhi mōkī pārongo i te mēra. Mehemea e pai ana ki a koe te rārangi e noho nā koe, kāhore he mahi atu anō. Mehemea e hiahia ana koe ki te whakawhiti rārangi, waitohungia te reta, me te tuhi i te rā, ā, whakahokia te reta, toro atu rānei ki vote.nz ki te whakawhiti ā-ipurangi.
‘Mehemea kāhore anō koe kia whiwhi mōkī pārongo, he tohu kāhore mātou i te mōhio ki tō wāhi noho o nāianei, kāhore anō rānei koe kia rēhitatia,’ te kī a Karl Le Quesne. ‘Ka āhei koe ki te rēhita, ki te whakahou i ō taipitopito wāhi noho, ki te whakawhiti rārangi rānei, mehemea rā e hiahia ana koe ki te whakawhiti – toro mai ki vote.nz, whakakīia rānei tētehi puka rēhita hou.’
Mehemea e hiahia ana ngā uri Māori ki te whakawhiti rārangi pōti i mua i te Pōtitanga ā-Motu o te 14 o Oketopa, me whakawhiti i mua i te 13 o Hūrae i te waenganui pō.
Hei te pōtitanga o tēnei tau, ka pōti ia kaipōti o te rārangi Māori mō tētehi kaitono i tētehi rohe pōti Māori, ā, ka pōti ia kaipōti o te rārangi whānui mō tētehi kaitono i tētehi rohe pōti whānui. Kotahi anake te rārangi o ngā rōpū tōrangapū hei pōti mā te tangata ki tāna pōti ā-rōpū, ahakoa kei te rārangi Māori ia, ahakoa kei te rārangi whānui rānei.
Toro mai ki vote.nz e kitea ai he whakamāramatanga nō, waea mai rānei ki 0800 36 76 56 ki te tono kia tukuna atu tētehi puka rēhita ki a koe.